У музеі чатыры пакоі. У першым пакоі размешчана экспазіцыя
“Стала песняй у народзе…”.
Раздзелы экспазіцыі:
- Вытокі. Сям’я Пашкевічаў;
- Віленскі перыяд жыцця і творчасці Цёткі;
- Львоўскі перыяд жыцця і творчасці Цёткі;
- Пецярбургскі перыяд жыцця і творчасці Цёткі;
- Вобраз Цёткі ў літаратуры, музыцы, жывапісе і скульптуры.
Каштоўныя экспанаты распавядаюць пра сям’ю Пашкевічаў, дзяцінства і юнацтва Алаізы, пра рэвалюцыйную і асветніцкую дзейнасць Цёткі, пра вучобу і творчасць у Пецярбурзе, Львове і Кракаве, Вільні і Мінску. Прадстаўлена многа фотаздымкаў паэтэсы, яе родных і сяброў, выдатных дзеячаў культуры, якія аказалі ўплыў на станаўленне яе грамадзянскай пазіцыі і літаратурную творчасць. Экспанаты экспазіцыі расказваюць пра ўшанаванне памяці Цёткі.
У другім пакоі размешчана экспазіцыя “Гучыць яе ліра нанова…” Раздзелы экспазіцыі «Шчучыншчына літаратурная», «Гродзеншчына літаратурная» знаёмяць наведвальнікаў з паэтамі – землякамі, якія ідуць паэтычнай сцяжынкай, пратаптанай нашай славутай зямлячкай.
З этнаграфічнай экспазіцыяй “Сведкі мінуўшчны”, дзе сабраны разнастайныя прылады працы і прадметы побыту сялян канца ХІХ – пачатку ХХ стагоддзя, можна пазнаёміцца ў трэцім пакоі музея.
Экспазіцыя “Тут родзіцца думка за думкай…” (Астрынская школа:гісторыя і сучаснасць) размешчана ў чацвёртым пакоі музея.